早晨！ 先生/ 小姐可以幫我買支旗嗎？
相信每逢周三或周六上午街上，你一定聽過近似的說話。
18.7.09，C&F一班義工就拉隊去賣旗，主辦單位正是我們的重點服務機構 - 寰宇希望。
寰宇希望於1993年透過成立香港辦事處，現時香港的服務對象是低下階層的兒童和青少年、他們的家庭和弱勢的老人及內地的貧困兒童。
當日天氣悶熱，C&F一班義工細分成2-3人一個小組分佈在各馬路口、港鐵站出口、巴士站等，希望在有限時間內籌募得最多的善款。
巴士站是主要的銷售點，勝在人流多呢 !
等待過馬路的善長，來買支旗支持一下寰宇希望呀！
一行13人，來個大合照紀念下先。
以下是部份義工的感想:
一個需要清晨集合既義工服務，但無阻 c&f 一向守時既作風。早上七時正齊齊於集合地點分組派旗袋。我成個朝早都係同一地點，滙豐銀行總行門口賣旗。
成朝有唔同既人仕：著得好靚而跑住返工既 OL，陪我兩個鐘既派報紙嬸嬸，係同一條街不停來回搬運既大隻佬答應我會去完銀行返黎，同我賣旗既哥哥仔。當然仲有專程到場探班既 雪晴同 Ronald都令我成朝笑容滿面，因你哋都幫我買旗~~~~ hahaha
by 白骨
上一次賣旗已經是讀書時代, 心情有點緊張.雖然天氣真係好熱, 但大家都盡力去賣旗, 不過在短短的一個早上, 就見識到不同人的咀臉, 有啲人好自動自覺, 有啲人就"睬你都傻"!
但無論如何, 大家都費盡唇舌, 盡力募捐, 都係想幫到有需要嘅人士
by Sabrina
好耐無試過賣旗啦, 都幾緊張架~~
有d人一見到你拎住個旗袋, 即刻打斜cut黎行, 不過又會遇到d人真係好有心, 佢地特地去打散d紙幣去買旗。 最開心係, 我成功地叫左個外籍人買旗, 不過睇唔到佢入左張咩貨幣0既papernotes入旗袋, 唔知寰宇希望收到會點呢
by Beatrice
我都係第一次賣旗！可能有過幾次街頭募捐既經驗，所以今次對於公眾比較見慣見熟既賣旗當然無咁怕喇。
同EC兩個走左去皇后像廣場後面一個無風到既屏風巴士站駐守，同場得我地兩個獨市 XDD....不過就焗左幾粒鐘... 見人落車就保持唔好嚇親人既距離飄埋去，我都有個陪左我兩個鐘既派報紙嬸嬸，仲幫我睇有無車黎，教我摩打手貼旗招數，果然有效率好多！！！
再一次證實一ｄ外表老粗既大叔比起好多人慷慨！多謝晒幫我買左旗既路人sssss....下次一定再來～～！
by Lamji
我的第一次賣旗拍住打米同Helen... 個旗袋真係比我想像中重... 個膊頭仲有D痛. 不過今次真係要多謝所有買旗人士. 當中仲有唔少係主動走來買... 香港人其實都好有心的.
by Winnie
今次係我第一次賣旗.雖然只係瞓得 3 個鐘.. 個人都真係好攰.但一諗起我地一大班 C&F 去賣旗, 而且仲係做善事.. 所以就算幾攰都一於頂硬上.點知出乎意料之外, 個感覺都幾好....而且仲好開心添....
雖然有好多著得外表好光鮮, 好多名牌係身o既人士都無買到.. 不過唔緊要, 因為我地都遇到好多好多有心人... 有好多都係自己自動行埋嚟買添噃...我又遇到有個男士, 我行埋去叫佢買旗, 點知原來佢已經買咗, 係我睇唔到.. 但佢好好呀.. 佢居然話, 好丫.. 買多張啦... heehee (^_<)....之後我又遇到幾位外郎主動走埋嚟問係唔係 donation, 之後就入 $$ 喇....
由有 d 家長帶住 d 小朋友, 叫 d 小朋友入 $$ 嚟買旗, 真係好好.. lee d 咪叫做身教囉...仲有.. 我發現好多人都問 "寰宇希望" 係咩機構, 做 d 咩o架咁... 所以下次賣旗都要了解清楚果個機構先得.
by Helen
印象最深刻係有個落車眼凶凶的先生，當我問他買旗時，即變和善樣! 所以話呢...做得善事多真係...人都靚仔D架~!
by EC
雖然我年年都有參與賣旗活動，但今年遇上不認識「寰宇希望」的比較多，在今次賣旗的過程當中，學會了多一樣賣旗方法，就是在等待買旗者找善款時，向佢介紹一下受惠機構，令佢地知道自己幫助邊d人和對呢個機構認識更多。
by 貓糊
是次賣旗秘技是交易完成後加一句"身體健康"，有些祇找到很少碎紙的人士不好意思，便再加多一句"身體健康最重要，搵多d時再捐多d啦！"
by 靚女Aunt
