香港新浪網 MySinaBlog
« 上一篇 | 下一篇 »
Carson & Friends | 31st Dec 2010 | 義工服務 | (172 Reads)

唔知道大家去過沙田既香港文化博物館未呢?今次我地帶匡智松嶺三校既小朋友參觀既地方就係呢度啦。

館入面有兒童探知館、新界文物館、粵劇文物館等等唔同既館,一一為大家展示香港既歷史文化,大人小朋友都o岩玩。館內既展品非常豐富,唔少都裝左可以活動既裝置,令一班小朋友可以盡情探索,真係樂在其中呢!

同小班友嘻嘻哈哈玩左一個早上,之後我地就返大埔一齊飲茶,唔知係唔係小朋友們今日心情特別好,加上走動比較多花左好多體力,大家都好好胃口呀!

希望好快可以再同佢地參觀唔同既地方~

Picture
義工們都帶載著愉快的心情離開

義工心聲﹕

今次是 C&F 2010年最後一個義工服務,由於天氣寒冷的關係,我地轉了去沙田文化博物館。
首先我地去左地下的兒童探知館,我拖著細孖一路行來行去,有時候她會停下來看看展品,不過唔到幾秒就要繼續行,總之唔可以停下來。之後我地又上左大戲館同新界歷史館,同其他義工轉下小朋友之下同左嘉琪、SAM哥、銳藝、運泰,不過最吸引他們的就係鏡子館,個個見到自己的樣子都笑得好開心。
到左食飯時間,我負責餵嘉琪,可能我太靚仔的關係,她唔肯食掛住同我玩連匙都掉埋.....看來我要好好練習下點餵小朋友食飯。
(Carson)

今日我同可怡一齊去玩,佢成日都乖,笑容好多,見到佢都笑咗出嚟。
參觀博物館嘅時候見到光同埋色彩繽紛嘅嘢都笑得好燦爛。可怡都好鍾意喺鏡前面玩,佢見到自己個樣都好興奮同開心。
我第一次參加戶外活動,第一次餵佢地食飯,初初都唔係好習慣,觀察一陣姑娘同埋其他義工點做,慢慢開始上手。可能可怡好肚餓,佢食得好快,食咗好多嘢。
今日盡興而回,渡過了美好的2010,來年繼續努力。
(樂文)

今次我同廸廸仔一組~
經過參觀多個展館之後, 我發現佢對啲有變化既光線較為有興趣。所以我同佢係一個較多光線既"新城市發展"逗留得耐啲。
廸廸仔係食攪碎餐既, 而佢都係食嘢方面都好叻仔, 同佢餵食都好容易。
每次 outing 我都覺得更加認識佢哋!! 識多一個朋友仔!!
(白骨)

今次Outing由原先戶外移師到室內,以太興奮既心情參與靜態既活動,難怪同我一組既家寶轉唔到台,要全程行快d衝快d佢先適應返個節奏。
文化博物館我自己都只係去過一兩次,地方大又舒服,好岩我地黎Hea...kakaka
不過講到全日最滿足,相信家寶會揀係食飯!口部肌肉能力較好既佢自給自足,好方便,
攪到平時餵慣郭婉雯既我有d唔習慣,哈哈。
睇住隔離既Carson餵到咁,又睇住靜菊過黎幫拖:完全唔駛比時間,係咁塞羹飯入口果隻,堅勁!就覺得我地實在係太斯文喇,又學到野!有機會真係要實習一下!!!
(Lamji)

 


[1]

期待黎梗10/4 Outing....yeah~~~~

Lamji
[引用] | 作者 Lamji | 7th Apr 2011 | [舉報垃圾留言]

[2] 松三活動

謝謝你們的參與,同學仔能跟你們把臂同遊亦十分開心.


[引用] | 作者 靜菊 | 19th Jan 2012 | [舉報垃圾留言]